वि.सं. २०७५ असार ९ गते गते नेपाल प्रज्ञा–प्रतिष्ठानको ६१ औँ वार्षिकोत्सवका अवसरमा प्रज्ञा भवनमा आयोजित राष्ट्रिय कविता महोत्सव–२०७५ मा काभ्रेका कवि फूलमान बलको ‘इन्द्रेणी गीत’ शीर्षकको कविता प्रथम भएको छ । महोत्सवका लागि प्राप्त २ सय २९ वटा कविताहरूमध्ये कवि बलको कविताले सबैलाई उछिनेको हो ।
यसपटक धादिङकी कवि सुनिता खनालको ‘श्यामश्वेत फोटो’ द्वितीय भयो । महोत्सवमा रामेछापका कवि जीवन खत्रीको ‘एउटा अर्काे प्रयास’, तेह्रथुमकी कवि एलिना दुलालको ‘लाहुरेकी स्वास्नी’ र मोरङकी कवि मेनुका चापागाईँको ‘बिराएँछु बाटो’ तृतीय भएका थिए ।
प्रथम हुने बलले स्वर्ण पदकसहित ३० हजार रूपैयाँ, द्वितीय हुने खनालले रजत पदकसहित २५ हजार रूपैयाँ र तृतीय हुने खत्री, दुलाल र चापागाईंले कास्य पदकसहित जनही २० हजार रूपैयाँ पाउनेछन्न् । पुरस्कार र पदक राष्ट्रपतिबाट हस्तान्तरण गरिने प्रचलन रहिआएको छ । डा. हेमनाथ पौडेल, साहित्यकार मञ्जु काँचुली, प्रा. जगत उपाध्याय, कवि तथा समालोचक कृष्ण प्रधान र प्रा.डा. गोपिन्द्र पौडेल रहेको मूल्याङ्कन समितिले कविताहरू मूल्याङ्कन गरेको महोत्सवमा बताइयो । महोत्सवको उद्घाटन गर्दै संस्कृति, पर्यटन तथा नागरिक उड्डयन मन्त्री रविन्द्र अधिकारीले स्रष्टाहरूका लागि महोत्सव प्रेरणादायी हुने दाबी गर्नुभयो ।
“काव्य क्षेत्रमा कस्ता सिर्जनाहरू हुँदै छन् भन्ने मानक पनि हो महोत्सव,” उहाँले भन्नुभयो, “समाजमा भएका विभिन्न राजनैतिक परिवर्तनमा कविता, गीत र सङ्गीतको पनि उत्तिकै योगदान रहँदै आएको छ ।”
वि.सं. २०२२ देखि महोत्सव हुँदै आएको जानकारी दिँदै कुलपति गङ्गाप्रसाद उप्रेतीले प्रतिष्ठानको जीवनमा महोत्सवले धेरै महत्व राखेको बताउनुभयो । महोत्सवमा मन्त्री अधिकारी र कुलपति उप्रेतीले ‘बृहत् शब्दकोश’ को नयाँ संस्करण पनि लोकार्पण गर्नुभयो । प्रतिष्ठानका पूर्व कुलपति बैरागी काइँला, उपकुलपति विष्णुविभु घिमिरे, काव्य विभाग प्रमुख अमर गिरी, सदस्य–सचिव प्रा.डा. जीवेन्द्रदेव गिरी लगायतले महोत्सवको महिमा’bout प्रकाश पार्नु भएको थियो ।
यसपटक २ सय २९ मध्ये उत्कृष्ट ३६ रचना वाचनका लागि छानिएका थिए । तीमध्ये सुवास संगम राई, कल्पना काफ्ले, गणेश भट्ट ‘अणु’, प्रकाश रम्घाली, रञ्जना निरौला, त्रिभुवनचन्द्र वाग्ले, शान्ति अधिकारी, पर्शुराम भट्टराई, डिल्लीप्रसाद मूलतिहुन, हीरा भट्ट, जीवन आरोही, अग्रिम अधिकारी, कविता राई, सुभासचन्द्र भण्डारी, सचित राई, नवीन प्यासी, सुशीला खड्का, भुवन शिवाकोटी, ओमप्रसाद कोइराला, रसिक राज, ज्ञानेन्द्रबहादुर सिंह, धर्मानन्द भट्ट, सीता भण्डारी, गिरि श्रीषमगर, शान्ति शर्मा, सौरभ सुनार, सुन्दर शिरीष, नारायण सापकोटा, टहल दाहाल नवीकरणले कविता सुनाउनु भयो ।
महोत्सवमा प्रतिष्ठानका आर्थिक प्रशासन महाशाखा प्रमुख सुमन अधिकारीलाई २५ हजार रूपैयाँसहित दीर्घ सेवा पदकसमेत प्रदान गरियो । वार्षिकोत्सवको अवसरमा प्रतिष्ठानमा साङ्गीतिक प्रस्तुतिसहित विशेष कला–कविता कार्यशाला एवं कला प्रदर्शनीसमेत गरिएको थियो ।
